Nunga lobi samasa onan dang masuk si Mehwa marsingkola, dung mulai mulak hami sian Tinggi Raja.
Sai lulu-lulu do rohangku, alani aha umbahen na so masuk ibana tu singkola.
Somalna nian, sai ditelepon ibana do tu jabu kos nami molo dang masuk ibana marsingkola. Alai saulak on, dang adong boa-boana manang alani aha ibana dang masuk marsingkola.
Ah! Tu jabuna ma ahu annon botari mardalani. Asa laos huboto jo alani aha ibana dang masuk marsikkola, ninna rohaku sip dibagasan.
Ditopap si Jafar abarangku tingkii na marangan-angan i ahu. "Boss! Aha namasa uju na borhat hamu tu Tinggi Raja?" ninna si Jafar manungkun ahu.
"Dang adong nian na apala dia. Tabo do hami, rap martata do hami sude. Gariada dohot do uju i Among ni si Mehwa rap dohot hami" ningku mangalusi ibana, jala dang adong surasura ni rohangku na tudia sundung ni sungkun-sungkunna i.
"Songonon do boss...! Atik na holan sitalbeonna sambing do na berengon martata, alai maniak dibagasan ateatena" ninna ibana songon na manungkapi rohaku.
"Bah! Boasa dohononmu songoni Jafar? Songon na so adong huhilala dalanna mengkel di napatar si Mehwa, jala tangis di sihabunian maradophon ahu" ningku ma nian mangalusi ibana, ala nunga hira na dapot rohangku sundung ni sungkun-sungkunna i
"Na so diboto ho do bos songon dia roha ni si Mehwa na saleleng on tu ho?
Dang na so godang manjonohi ibana di parsikolaan on. Alai holan tu ho do rohana bos. Ahu. Ahu pe dohot do sada na hea mandok hatana tu si Mehwa. Alai songon na hudongkon i do bos. Holan tu ho do holong ni rohana" ninna ibana songon na patorangkon tu ahu.
Tompu songon na tarhatotong ahu mambegei hata ni si Jafar i, ragam ma disura-sura rohangku.
"Atik alani naung patar do na si Minah donganku na rumoing uju na tu Tinggi Raja i hami? Gabe songon lagi dipamiaran panghilalaan ni si Mehwa holongn ni rohana tu ahu i. Nian, ndada na hea hudok hatangku tu ibana. Alai tutu, dang na holan mardongan boti be hami di rohana". Songoni ma rohangku sai marhusori di bagasan.
"Boh! Gabe marangan-angan do ho bos" ninna si Jafar ma tu ahu huhut ditopap ibana muse abarangku.
"Annon botari ma jo hupatangkas tu jabuna, atik alani aha ibana dang masuk marsingkola na saminggu on." ningku ma nian tu ibana.
"Olo bos! Sungkun ma jolo tutu ibana bah. Atik na marsahit muse do ibana dung na sian Tinggi Raja i hamuna" ninna ibana mandapothon hatangku.
Dung dapot botari, hupaharuar ma lerenghu sian dapur. Naung tu jabu ni si Mehwa ma disangkapi rohangku, laho patangkashon atik ala ni aha umbahen dang marsingkola si Mehwa sampe samasa onan lelengna.
"Laho tudia ho Bang Slow?" ninna si Minah manungkun ahu tingki na hupaharuar i lerenghu.
"Laho tu jabu ni si Mehwa do ahu Minah. Nunga saminggu dang masuk i ibana marsingkola. Asa pinatangkas jo atik alani aha" ningku ma mangalusi ibana.
"Oh... Manat-manat Abang di dalan dah!" ninna ibana tu ahu.
"Olo Minah, satongkin do ahu" ningju msngakusi ibana.
Hugohet ma lerenghu manuju jabu ni si Mehwa, huhut sai hupikkiri hata ni si Jafar i. Sipata soluk muse pingkiranku tu si Minah. "Boasa tung so adong agia saotik ora-ora ni si Minah na tu jabu ni si Mehwa ahu?". I ma sada ri tu pingkiranhu.
"Perhatikan jalanmu hoi..!" ninna sahalak kenek ni angkot na mamolus sian lambungku.
Hubereng, nunga apala ditonga ni dalan i hape ahu na marlereng i. Gabe manopinopi ma ahu na marlereng i sahat tu jabu ni halak si Mehwa, dung didok kenek ni motor i songon i.
"Bah! Na ro do ho Slow?" ninna among ni si Mehwa ma tu ahu, dung sahat ahu tu jabu ni nasida.
"Olo tulang. Na laho tu lapo tuak do nangkiningan ahu. Nisangahon jo tahe apala satongkin mandapothon si Mehwa, asa laos sinungkun jo atik alani aha umbahen na so masuk ibana marsingkola na saminggu on.
Na i do nangkininan ro tu rohangku umbahen na ro ahu Tulang" nikku ma mangalusi Among ni si Mehwa i, huhut songon na paboahon dalan harorongku tu jabu i.
"Unang pola tuak jo inum saulak on. Dison ma hita manginum arak na sian huta nami" ninna Among ni si Mehwa tu ma ahu.
"Nauli Tulang. Alai tuak ma nian di ahu.
Ai pakarashu do ra arak na sian huta muna i molo tu ahu" ningku ma nian.
"Awal...! Kemari sebentar!" ninna Among ni si Mehwa manggora pangurupina. Pintor hatop do pangurupina i ro songon na marlojong.
"Ada apa bos?" ninna si Awal i manungkun tuanna, Among ni si Mehwa i.
"Nah! Lu pergi dulu beli tuak bagus. Kalau nanti lu lihat si Purba sama si Anipar, ajak kemari minum sama. Biar gabung dulu kami nyanyi lagu-lagu Batak.
Tuak bagus yah!" ninna among ni si Mehwa ma tu pangurupina i, huhut dilean ibana hepengna tu pangurupina i.
"Ok bos." ninna pabgurupina i mangalusi, jala laos borhat ma ibana markareta laho manuhor tuak i.
Dung adong antar piga minut hami na hundul i, didok Among ni si Mehwa ma hatana na gabe sipingkiran di rohangku.
"Aut sugari dipabalga ho panuanan ni bunga naopat i, dang songonon namasa on Slow".
Songon i ma hata ni Among ni si Mehwa tu ahu huhut marhosa ganjang ibana mandok hatana i.
"Bah! Na gabe boha do huroha tulang?" ningku ma jala songon na songgot rohangku umbegei na nidokna i.
"Dung na mulak sian Tinggi Raja i hita. Marsogotna i, pingtor bungkas do si Mehwa sian jabu on, dang niboto atik na tudia lao.
Maraut nuaeng dang mulak dope Nantulangmu dohot angka iboto ni si Mehwa mangalului ibana" ninna ma huhut songon na diapus ibana simajujungna.
"Jei, dang adong dope diboto hamu atik na tudia ibana lao Tulang?" ningku ma songon na songgot rohangku dibahen di pandohan ni Among ni si Mehwa i.
"Daong dope Slow. Dang binoto atik boi disura roham na tudia ibana borhat. Asi ma jo roham tu hami Slow" ninna among ni si Mehwa i songon marpangelek mandok hatana i. Marudut. (Ir Abdel Sinaga)
){kind=link}
0 Komentar