 |
| Foto Ilustrasi |
Na so sian panagaman, tarsonggot ma hami sude alani surak-surak ni Abangku.
"Adong dope apala santanggo nai di hami nadua Anggia?" ninna Abangku marsurak dung dibereng nasida hami.
Ro ibana mandapothon hami tu Tinggi Raja, rampak dohot Laengku hela ni Namboruku.
"Adong dope Abang. Pahundul hamu ma! Asa rap mangan hita." ningku ma nian mangalusi ibana. "Olo bah Anggia, alai selamat ulang tahun ma jo nidok parjolo ateh?" ninna Abanghi huhut manjalang ahu, laos mangihut ma muse Laengki manjalang ahu dohot mandok hata selamat ulang tahun tu ahu.
"Napinadar on do di Abang manang na panggang guling on do? Bahen jo indahan i laho tu halak abang on Mehwa!" ningku manungkun halak Abang i, jala huhut marsuru si Mehwa.
"Panggang guling on ma jo di ahu bah Anggia. Boha lae?" ninna Abangki mangalusi ahu, jala laos manungkun lae i aha na laho di Lae i.
"Ah, hurang do ahu mangallang jagal lae. Kapiting i ma di ahu" ninna Lae i mangalusi.
Rap mangan ma hami dung dibahen si Mehwa sipanganon ni nasida. "Abagoh! Tabo ma daini panggang guling on. Ho do mamanggang on Anggia?" ninna Abang i manukkun ahu.
"Daong Abang. Tulang on do nangkiningan mamanggang i" antar ningku ma nian margait. "Ah! Aut na marbaju nakkin na mamanggang on. Ikkon hu subut rohana i asa olo ibana gabe parumaen ni Inong bah" ninna Abang i songon na marsitutu mandok hatana i.
"Uhuk... Uhuk..."
Songon na mongkol-obgkol Among ni si Mehwa. "Boha dai ni Kapiting mi lae?" ningku ma margait tu halak Laengki. "Ah! Lae on nian. Holan na naeng manaoni do huida hata ni lae bah. Alai aut na marbaju ma nian na mangalompa kapiting on, nda ingkon huelek asa olo gabe Anggiboruku" ninna ibana huhut mengkel suping ibana.
"Na godang akka hata muna. Borat do dah tu na mangalompa kapiting i. Ikkon na boi do monang iba marsatur tu ibana asa boi marpangidoan iba" ningku ma huhut humata sabihon si Helda.
Dung sidung hami marsipanganon pintor dibuat si Helda ma satur na niuhirna i sian bagas mobil, laos dilehon ibana ma tu ahu.
"Nah Slow! On ma sian ahu di ari ulang tahunmon. Pangidoanku, jolo marsatur ma hita, asa lao hamu tungkan dolok an dohot si Minah. Ateh Minah!?
Boi do kan?" ninna si Helda huhut dibereng ibana dompak si Minah. "Bah! Na diboto itoanon do marsatur?" ninna Abanghu manurdukhon hatana. Hubungka papan satur na nilehon ni si Helda i, jala hupatudu anak ni satur i.
"Hea do dibereng Abang songonon satur?" ningku ma niantu Abangku, huhut hupatudu anak ni satur i tu ibana.
Dibereng ibana bohingku dohot bohi ni si Helda, dung dibereng ibana anak ni satur i. "Bah! Sian dia do dipatompohon ho satur i ito? Boi suman mesana dohot rajana tu hamu nadua" ninna Abangku manungkun si Helda.
"Bang Carles... Bang Carles! Unang pola na marsatur. Haru na mambahen satur on si Helda on do" ningku ma huhut mekkel suping ahu tu Abanghi.
"Ah! Antong hita ma jo marsatur ito!" ninna Abangku songon na naeng manguji si Helda. "Boi do i Bang Carles. Alai hami ma jo parjolo mamuhai mamangke satur on dohot si Winslow. Huhut manonton annon hamu, pingkiri hian ma aha partaruanta annon" ninna si Helda ma tu Abangku.
"Jei, aha partaruanta saulakon Helda?" ningku ma manukkun si Helda. "Molo monang ahu. Lehononmu pinjamonku kassa mata na birong ampunami, jala laos markodak hita nadua. Alai ingkon rumoing do dah hita molo markodak" ninna ibana mangalusi ahu. Ihut ma tahe engkel supingna sian sitalbeonna na rara i.
"Molo manginjam boi. Markodak pe boi." nikku mangalusi. "Alai na markodak i hita annon haolonmu do ahu sian pudi dah! Nanggo apala i di ahu" ninna ibana ma muse manggogohon pangidoanna i. Tong ma huhut mengkel suping ibana mandok hatana i.
Umbegei pangidoan ni si Helda i, songon na alo do huroha tu roha ni si Minah.
"Uhuk... Uhuk...Naboi do pangidoanmi Kak. Alai dang Bang Slow na gabe alom marsatur. Ahu do alom" ninna si Minah manolukhon hatana, dung jumolo antar dipaula ibana antar songon na mongkol-ongkol.
Tarsonggot ahu dohot si Helda nang si Roma umbegei pandohan ni si Minah i.
Pamotoan nami, dang na hea marsatur si Minah saleleng on. "Na mandok sipiga do ho Minah?" ningku ma tu ibana. "Saleleng on, sai marsiajar marsatur do sahalakku ditonga borngin i Bang Slow.
Pos ma roham Bang Slow! Huboto do marsatur" ninna ibana ma songon na paposhon rohangku.
"Jei molo monang ho Minah, aha dipangido ho songon partaruanna" ninna si Helda tu si Minah.
"Molo ahu na monang. Bahenonmu sada nai satur na suman tu ho dohot tu bang Carles mesa dohot rajana.
Holan sa plat do parmainan ta, boha?" ninna si Minah manungkun si Helda.
"Satolop" ninna si Helda.
Marsatur ma nasida nadua dung massipaunduhan di hata ni partaruan, jala manonton ma hami sude.
Lomos do mulana rohangku mamereng si Minah na marsatur i.
Toho do nuaneg diboto ibana marsatur?, ninna rohangku sip dibagasan. Alai gabe ro do pos ni rohangku dung antar adong dua tolu langka dilangkahon ibana anak ni satur i.
Ai huhut marende do ibana nenget-nenget tingki na padalanton anak ni satur i.
Sian na so panagaman ni rohaku, monang do si Minah maralohon si Helda.
"Uduti hamu ma jolo na marsatur on ateh!? Tungkan dolok an jo hami mardalani dohot Bang Slow" ninna si Minah dung dipatalu ibana si Helda na marsatur i.
"Bang Carles i ma jo alom marsatur ateh Heldah!?" ningku ma huhut mardalan hami dohot si minah tungkan dolok ni inganan i.
Dilehon si Minah ma tu ahu sada jom tangan tingki na paduadua i hami.
"Dang hea maradian tingki Abang.
Jala ingotma! Dang hea boi lupahononmu ahu, suang songoni nang ahu, dang boi lupahononku ho Abang, saleleng mardalan dope partingkian." ninna ibana huhut dipangkehon ibana jom tangan i tu simangidongku.
"Mauliate Minah!" ningku huhut huhaol ibana jala huumma lambok pardompahanna.
"Dideng jo ahu huhut paabing-abing Bang Slow!" ninna ibana huhut mengkel suping mandok pangidoanna i.
Huabing ma ibana, huhut sai hupanotnoti bagas tu simalolongna. Huida simalolongna i tarsongon na mangkatai tu ahu. Bagas, bagas huida pandohan na diungkaphon ibana marhite panatap ni simalolongna i, tingki na huabing i ibana. Marudut. (Ir Abdel Sinaga)
){kind=link}
0 Komentar