Disada tingki mardalani ma Inonghu tu jabu ni Ompunghu. Sian jabu ni Ompunghu disorohon Inonghu do ro tu jabu kos nami laho mandulo ahu, huhut pataru hepeng balanjongku.
Di haroro ni Inonghi, topet baru mulak ahu sian parmituan.
"Bah! Na sian dia do ho amang? Ro iba mandulo ho, hape laos so di jabu ho jumpang niba." ninna Inonghu tu ahu.
"Pola ma sian dia nian ibana namboru. Molo so sian jabu ni donganna, bah sian lapo tuak" ninna si Helda manjujukhon hatana. "Bah! Unang sai pagodang-godanghu ho minum tuak dah amang!?
Ipe, unang pola sai siganup ari ho marlapo-lapo" ninna Inonghu tu ahu, lambok pandokni hatana i tu ahu.
"Olo Inong... Dua tolu hali do ahu saminggu tu lapo. Ipe dang ala ni godang na nian huinum. Holan sidalian laho marende do dohot angka dongan" ningku mangalusi, huhut hujalang Inonghu.
"Lao ma jo martapian neih! Asa pataru jo ahu tu simpang Medan. Mulak do ahu saonari. Holan na pataruhon balanjom do ahu satokkin." ninna Inonghu marsuru ahu, jala paboahon na laho pintor mulak do Inonghi.
"Olo Inong" ningku ma mangalusi Inonghu, jala laos martapian ma ahu.
Holan sae ahu martapian dohot marpahean, hudapothon ma muse Inonghu na rap hundul dohot si Helda. Sian na so panagaman ni rohangku, hape nunga disi be huida halak Nantulang parjabu kos nami i dohot si Minah, nang dohot si Roma.
Disungkun Inonghu ma tu Nantulang i manang na songon dia parangengku di jabu i.
"Santabi jo eda! Adong do moru ni bere muna on na marlapo tuak i?" ninna Inonghu manunkun Nantulang i.
"Moru do eda. Dang sai ganup ari be ibana marmitu. Ai nunga sai halilian ibana marsatur dohot si Helda on. Molo tung lao pe ibana minum tu lapo, antar jom onom songonon ma parmulakna. Dang na hea be sampe mulak borngin" ninna Nantulang i patorangkon tarsongon dia parangeku di jabu i.
"Sabar ma eda mamoda-modai beremon dah eda!? Las rohaku ala didok hamu naung moru ibana tu lapo tuak" ninna Inonghu tu nantulang i.
"Olo eda. Alai gumodang ma dok mauliate tu si Helda on, ala sai ibana do donganna masatur-satur dung mulak nasida sian singkola" ninna Nantulang i tu Inonghu.
Hu bereng si Helda, antar dipahusor ibana parhundulna mandompakhon Inonghu.
"Mauliate dah anggi! Boi dibahen ho halilian anakhon, dang pola be sai tu kode tuak. Alai unang martaru hepeng hamu dah!?" ninna Inonghu tu si Helda, huhut dijama inonghu simangido ni si Helda.
"Olo namboru. Dang na hea hami martaru hepeng. Holan na martaru mangalompa do hami dohot mardalan-dalan tu huta ni Ompung simatua muna" ninna si Helda.
"Oh... Ho do hape sada na hea diboan ibana mangkail na nidok ni parhuta i ateh?
Alai, marganti-soring do pandok ni parhuta i diboan si Winslow on donganna borua marmeami tu huta" ninna Inonghu.
"Si Minah on do sada na hea diboan ibana tu si mangkail Eda" ninna Nantulang parjabu i, huhut ditiop Nantulang i abara ni si Minah.
"Alai, adong do didok parhuta i hea diboan si Winslow on boru Sina tu huta i".
"Eh... Dongan sakalashu do i Inong. Hea do pajumpang hamu tingki ro ho Inong tu parsingkolaan nami" ningku ma manolukkon hatangku.
"Oh... Imadah. Burju-burju hamu na mardongan i, unang paurakhon!
Etong songon ibotom angka donganmu na sajabu on" ninna Inonghu pasingothon ahu.
"Olo Inong... Pos ma roha ni Inong!. Alai tambai jo annon tadingkon hepengmi dah Inong!? Naeng mardalani jo ahu dohot donganku di ari ulang tahunku" ningku ma nian songon na mangelek Inongku.
"Hu tambai pe. Alai, dang mulak huroha ho saulak on marulang tahun?" ninna Inonghu manungkun ahu.
"Sahali on, donganku ma jo mangalompa sipanganon hasolomanku di ari ulang tahunku Inong" ningku mangalusi Inonghu.
"Kak Helda na maloan mangalompa namboru. Olo ma ra Kak Helda ditahi roha ni Bang Slow laho mangalompa sipanganon hasolomanna di ari ulang tahunna annon" ninna si Roma manjunjukhon hatana huhut martata ibana.
Hubereng si Helda, hira na minar pardompahanna. Hubereng si Minah, sai songon na tungki simajujungna.
"Holan na manjuiti ahu do nian si Roma on. Awas ho annon dah Roma. Gabe songon na tungki si Minah holan alani hatam" ningku ma nian tu si Roma, alai holan dibagas rohangku sambing do hudok hatangki.
"Jei, songoni ma Eda. Unang pabornginhu ahu annon sahat di jabu. Asa dipataru berem jo ahu tu simpang Medan an" ninna Inonghu ma tu Nantulang parjabu i.
"Olo Eda. Pasahat ma tabe tu keluarga" ninna Nantulang parjabu i.
Dung marsijalangan Inonghu dohot nasida sude, haruar ma ahu dohot Inonghu sian jabu. Tingki na haruar i hami, dipakkulingi si Minah ma Inonghu dung di alaman ni jabu i hami.
Dang huboto atik na aha na sinungkun ni si Minah tu Inonghu. Ai dang tangkas hubegei hatana i, ala antar holang ahu sian nasida.
Dung ro motor angkot, borhat ma hami dohot inonghu tu simpang Medan. "Nah amang! Garar ma annon hepeng kosmu dohot hepeng bulananmu tu lapo parmanganan mi dah! Molo bait dia hurang hepengmu na laho mardalani di ari ulangtahunmon, jalo ma tu Inangudam.
Alai burju-burju ho marsingkola dah amang!?" ninna Inonghu tu ahu huhut dilean hepeng na laho balanjongku.
"Olo Inong... Pos ma roham! Burju pe ahu marsingkola" ningku ma huhut manjalo hepeng na nilehon ni Inonghi.
Dung borhat Inonghu naek mobil bus jurusan tu huta nami, mulak ma muse ahu tu jabu kos nami. Marudut...
(Ir Abdel Sinaga)
){kind=link}
0 Komentar