Hurippu do na laho mardalani tu inganan na rumoing ahu boanon ni si Mehwa tingi na tu Medan hami. Holan sahat hami di Stasiun Kereta Api Medan, nungnga pintor adong dua halak dongan ni si Mehwa ro manomu hami.
Sada mai baoa, jala na sada nai borua.
Marhata Sina ma si Mehwa dohot donganna nadua i, hira na patandahon ahu tu donganna na dua i. Di surdukhon donganna i simangidona, husurdukkon ma nang simangidongku.
"Lingling" ninna donganna na borua i. "Winslow" ningku huhut na marsijalangan hami. Songoni ma nang tu donganna na baoa i, na margoar si "Ahweng".
Sian Stasiun Kereta Api i, borhat ma hami tu dompak Belawan. Dang pola sadia lelrng, sahat ma hami tu sada jabu na balga. Hubegei soara ni musik marbabang-babang sian bagas jabu i.
"Na laho marhua do nuaeng hami tu son? Cafe manang Discotik dohonon, dang adong merekna. Inganan aha do nuaeng jabu on?" sai songoni ma rohangku sungkun-sungkun sip dibagasan.
Bongot ma hami tutu tu bagasan ni jabu i, jala hubereng ma na so hea hubereng saleleng on. Adong na marjuji piga-piga lobuan. Adong lobuan ni na marjanggar-janggar. Adong muse ma i na minum-minum arak Sina, dohot adong na marjogeti.
Timpul ni sigaret, suman ma hira na di parhobasan. "Na marhua do hita tu son Mehwa?" ningku ma tu si Mehwa hira na marhusip. "Marmeami Abang. Bereng-bereng Abang angka donganhi!
Na dia annon lomo roha ni Abang naeng marjoget dohot Abang, togu Abang ma tu san!" ninna ibana huhut ditudu ibana inganan parjogetan i.
Holan didok ibana songon i, nungnga mulai hira na so domu be tu rohangku. "Jei ho laho tu dia?" ningku ma nian tu ibana. "Asa dohot jo ahu marmeam tu san" ninna ibana huhut ditudu ibana dompak lobuan ni parjanggar-janggar na adong disi.
"Dison ma ahu minum molo boti. Dapothon ma dongan-donganmi!" ningku ma hira na runtus hatangku. Ujungna, saut ma tutu ibana marjanggarjanggar.
Hundul ma sahalak ahu manginum arak. Tingki na minum i ahu, tung so di inganan i do mian rohangku. Alai sai dompak si Minah do lao pingkiranhu.
Tingki na hundul i ahu minum arak, ro ma si Lingling mandapothon ahu, jala hundul ma iba di joloku. "Sudah lama kenal dengan Mehwa yah Bang Slow?" ninna si Lingling manungkun ahu, huhut diisi ibana arak tu bagasan galasna.
"Sekitar lima bulan" ningku ma nian mangalusi ibana. "Lima bulan? Tapi kok baru kali ini dia membawa Abang ke sini? Padahal, dia sering loh main ke sini" ninna ibana ma tu ahu.
Dang pola hualusi ibana. Alai, pittor jongjong ahu ala tarbereng ahu dibungka si Mehwa golangna dohot horunghorungna.
"Bentar yah Ling!" ningku huhut mardalan ahu dompak lobuan janggarjanggar na diihutton si Mehwa i. Hu bereng ma nungnga dipeakkon ibana horunghorung dohot golangna i tu nomor na di beberan ni parjanggar-janggar i.
Hupangke ma kassa mata na birong na sangkot di sakku ni salaoarhu. "Paorot sian i taruhan mi Mehwa!" ningku marhusip huhut hugoit ibana. Dibereng ibana ahu, jala hira na tarsonggot ibana.
"Tudia bahenon bang?" ninna ibana. "Colok naga 1-2-6" ningku ma nian tu ibana. "Na maol do dapot colok naga abang. Haru samata maol dapot" ninna ibana. "Antong buat ma partaruan mi, jala beta ma mulak!" ningku ma tu ibana.
Saut ma dipaorot ibana partaruanna i tu inganan na hudok i. Sude ma angka donganna i sibereng tu hami. Dang binoto atik ala na pinaorotna i partaruanna i, manang alani na marhata Batak i hami. Na hutuntun do nian marhata Batak mandok hataki, asa unang diantusi angka donganna i.
Dibungka na manghursuk janggarjanggar i ma langkop-langkop ni janggarjanggar i. Toho pullit ma mata 1-2-6. Sibereng ma muse sude akka donganna i tu hami, huhut marsidok hatana nasida. Tung saotik dang huantusi aha na nidok ni nasida.
Ai dang hinata, marhata Sina do sude nasida. "Naung godang do nangkiningan ho talu Mehwa?" ningku ma manukkun ibana. "Nungnga Abang. Ido umbahen pola sampe dohot golanghu nang horunghorungku hupartaruhon" ninna ibana mangalusi ahu.
"Jei, nungnga mulak hataluan mi, dung pullit nakkin mata 1-2-6 i" ningku ma manungkun ibana. "Nunga Abang. Gariada nungnga gabe marloppit hamonanganku.
Alai, dipangido nasida naeng mamereng kassa mata ni abang i. Na boi do tolpus pamerengan tu bagas langkop-langkop ni janggar-janggar i? Ido na naeng berengon ni nasida" ninna ibana pasahat hata ni angka donganna i.
"Nah! Lehon ma asa dipatangkas nasida" ningku huhut hulehon kassa mata na birong i na hupangke i. Dung adong dua tolu halak na manguji mamangke kassa mata i, dipaulak nasida ma muse kassa mata i tu ahu.
Hupakke ma muse kassa mata i. "Betah ma mulak!" ningku ma manogihon si Mehwa asa haruar sian inganan i.
"Satongkin nai Abang. Tabahen jo sahali nai partaruanta" ninna ibana mangidohon tu ahu. "Tole! Bahen ma tu mata 2-3-5 partaruanmu" ningku ma tu ibana. Jala dibahen ibana ma tu inganan na hudokkon i.
Dung dibukka muse langkop-langkop ni janggar-janggar i, toho pullit ma mata 2-3-5. Tong ma muse sibereng donganna i tu hami, jala huhut marsidok hatana.
Dibuat si Mehwa ma hamonanganna, jala mulak ma hami sian inganan i. Saleleng dipardalanan mulak, sai disulingkiti ibana ma tarsingot kassa mata nabirong i. Jala sai dipangido ibana asa hulehon kassa mata i tu ibana. Holan engkel supinghu do hubahen mangalusi pangidoanna i. Marudut...
(Ir Abdel Sinaga)
){kind=link}
0 Komentar