 |
| Penasehat PPTSB Jambi Ir Abdel Sinaga dan Keluarga. |
JAMBI-Penasehat PPTSB Jambi Ir Abdel Sinaga mengirimkan artikel cerita Batak di GWA PPTSB Jambi. Cerita kiriman ini bersambung dari judul yang sama dengan edisi yang berbeda. Redaksi mengutipya dari GWA PPTSB Jambi, silahkan dibaca, semoga bermanfaat.
☆ Ulos Na Matombuk (19) ☆
Songon ulluson assimun do idaon si Burssok anak buha baju ni halak si Ranap dohot si Sara, Si Jaiang do dibahen nasida goarna. Dang hinata, ringgas do si Halasson ganup ari pataruhon dali ni horbo laho allangon ni Nai Jaiang.
Holang dua ari dung tubu si Jaiang, pintor maranak do horbo ni nasida na pinarmahan ni si Halasson. Dang dope ringgas ni Ama Jaiang mandugu bagun-bangun dohot na patupa sup Batak, mambahen dang hurangan balanjo si Jaiang ala ni hipas ni Inongna.
Roha ni Nai Jaiang pe tahe tung sonang do dibahen Ama Jaiang. Holan molo ditaringoti Ama Jaiang do na laho borhat nasida manadingkon huta i, disi ma sipata songon na adong lungun ni roha ni Nai Jaiang idaon.
Holan disi mapipil pusok ni si Jaiang i, nunga disungguli Ama Jaiang tu si Nai Jaiang tarsingot pangidoanna na laho manadingkon huta bona pasogitna i nasida.
Alai dipangidohon Nai Jaiang do asa jolo mangalangka-langka nian si Jaiang, i pe asa borhat nasida manadingkon huta i.
"Molo siat pangidoanhu, nanggo apala jolo mangalangka-langka anakta on. Asa jolo diojakhon ibana simanjojakna ditano hatubuanna on, tano huta bona pasogitna on" songon i ma hata ni Nai Jaiang marpangelek tingki disungguli Ama Jaiang pangidoanna sinauju i. Dioloi Ama Jaiang do pangidoan ni Tungganiboruna i, ala songon na dapot rohana pangidoan i.
Disi mulai marsiajar mangalangka-langka si Jaiang, jala laos di si do tong mulai manggora-gora ibana manang marsiajar mangkatai.
Sai dituhuk Amongna do si Jaiang somalna molo laho maridi nasida tu passur paridian. Alai di na sahali i, dang dituhuk Amongna si Jaiang ala didok si Jaiang "Ardalan ahu Among, ardalan ahu", topet ditiop Ama Jaiang tangkar-tangkar ni sabun ting laho maridi nasida tu passur.
"Loja annon ho amang...
Dituhok Among ma ho!" ninna Nai Jaiang do nian asa unang mardalan si Jaiang tu passur. Alai sai marsigogo do si Jaiang ingkon mardalan ibana tu passur. Saut ma tutu songon pangidoan ni si Jaiang i. Nang tingki na mulak sian passur paridian pe, tong do mardalan si Jaiang.
"Tuani ma pajumpang hita bah Lae" ninna dongan huta ni halak Ama Jaiang, tingki mardalan halak Ama Jaiang mulak sian passur, Ama Jenni panggoaran ni amanta i.
"Bah! Apala aha na ringkot nian Lae?" ninna Ama Jaiang manapothon hata ni Ama Jenni i. "Songon do na hudok Lae. Ia tarutung na di huta i sude, nunga tu ahu be sude i dipasahat Ama Selpi. Jei, molo tung adong pe na madabu parbue ni tarutung i, so tung dibuat hamu be dah Lae!?" ninna Ama Jenni i tu Ama Jaiang.
"Taon na salpu, ahu do manjabati i sude. Alai saonari, gabe tu Lae dipasahat halak Amanguda i dang jolo mulakna sian ahu. Dang ro pe Lae pabotohon i tu ahu, nunga huboto i Lae" ninna Ama Jaiang.
"I ma dah Lae. I do na hupabotohon tu Lae" "Eh... Nunga hudok Lae, nunga huboto i tung pe so ro dope Lae. Sai mangomo ma Lae na manjabati tarutung i"ninna Ama Jaiang tu Ama Jenni.
Songon na mangindorat dihilala Ama Jenni pandohan ni Ama Jaiang i. Songon na hata uhum didok rohana tu dirina hata ni Ama Jaiang i na mandok " Sai mangomo ma Lae na manjabati tarutung i". Alai sambalik muse, dang boi tardok ni Ama Jenni na manghumi Ama Jaiang di pandohanna i.
Siboan pingkiranna be nasida satongkin jala rap hohom, dungi laos marsirang ma nasida sipatulus langkana be. Dang sahat dope halak Ama Jaiang tu jabu ni nasida, nunga pintor ro muse si Halasson mangadu nasida sian pudi.
"Lae...! Paima jo Lae...!" ninna si Halasson manggora Ama Jaiang. Ditailihon Ama Jaiang tu pudi jala dibereng ibana ma si Halasson na manggora i. "Bah! Aha i Lae?
Na manunda do horbonta? ninna Ama Jaiang manungkun si Halasson. Biar rohana so tung gabe manunda horbo nasida na pinarmahan ni si Halasson i, laos gabe paro dando.
"Daong Lae. Na adong do ro tu jabu mangarga horbonta sibadar i. Nunga sai dijua Inong nian alani marningot Inong di hata ni Lae. Alai sai manggogo na ro i laho manuhor horbonta sibadar i. Jei, tu jabu ma jolo hita Lae! Nunga paimahon be nasida di jabunta" ninna si Halasson patoranghon harorona mandapothon Ama Jaiang.
"I ma dah. Naeng mambuat mutina do nian horbonta horbo sibadar i. Alai tung pe songon i beta ma jo satongki tu jabu, asa jolo tapaulak jo tangkar sabun on tu jabu.
Inda tung boan-boanon on tu jabu muna" ninna Ama Jaiang, laos mardalan ma nasida tu jabu ni halak si Jaiang. Dung dipataru nasida tangkar sabun i, borhat ma nasida tu jabu ni halak si Halasson. Laos dohot ma dohot Nai Jaiang.
"Ai halak Amang Hampung do hape" ninna Ama Jaiang huhut disurdukhon ibana simangidona tu Hampung ni huta ni nasida i, laos ihut ma tu dongan ni Hampung na jongjong di lambung ni Hampung i.
"Olo Lae. Na laho monuhor horbonta sibadar on do nian didok roha ni Amang Camat on" ninna Hampung i huhut na marsijalangan i nasida.
"Na laho mambuat mutina do nian didok roha horbonta i Amang" ninna Ama Jaiang. "Baris-baris ni gaja di rura...""Nunga, nunga dapot rohanghu be i Amang Hampung.
Alai, tarhira sadia ma arga ni horboon naeng tuhoron ni halak Amang Camatta?" ninna Ama Jaiang mambahen gotap hata ni Hampung i.
"Hira sadia ma didok roham asam horbo na sada an didok roham molo naeng gadisonmu Lae?" ninna Hampung i mandodo roha ni Ama Jaiang.
"Molo i do Amang, Namboru on ma dongan muna Mararga. Ai Namboru on do ummalo tarsingot tu arga ni horbo" ninna Ama Jaiang mangandehon pangkataion i tu Nai Halasson. Mengkel suping Hampung i umbegei hatani Ama Jaiang i.
"Songon ma i Lae. Sadia asam ni horbo na sada an annon didok Ito Nai Halasson, sampulu hali arga ni i ma tuhoron ni halak Amang Camatta on horbo sibadar on" ninna Hampung i tu Ama Jaiang, huhut mengkel suping ibana mandok hatana i. Amanta Camat i pe dohot mengkel suping, hira na diantusi panghataion i.
Nian dang na diantusi Amanta Camat i marhata Batak. Ai halak Toraja do Amanta Camat i, jala nambura dope ibana gabe Camat di luat ni halak Ama Jaiang i.
Marudut...
☆ Ulos Na Matombuk (20) ☆
Sahat ma barita tarsingot tu horbo sibadar ni Ama Jaiang i tu sipareon ni Ama Selpi. Mohop situtu do roha ni Ama Selpi umbegei barita i, suang songon i nang roha ni Nai Selpi. Alai na apala ummohop di bagas roha ni nasida, dang tagam rohana na horbo ni Ama Jaiang do hape horbo na punarmahan ni si Halasson saleleng on.
"Patut do hape dang ro tu jabu on si Ranap i suruk-suruk laho marsali tingki partubu ni gellengna i ateh?" ninna Ama Selpi tu Nai Selpi tungganiboruna.
"I ma dah! Hape, di si hian ma naeng dondonan hian ibana di hata i, asa tu pardolok an ibana mangido pangurupion" ninna Nai Selpi mandapothon hata ni Ama Selpi i.
"Boha nama bahenonta asa bulus lao i sian huta on ateh? Naeng pajongjong jabu nama tuhor ni horbo sibadarna i hubegei..."
"Pajongjong jabu?" ninna Nai Selpi tompu alani songgot ni rohana di pandohan ni Ama Selpi i, mambahen gotap hata ni Ama Selpi i.
Tingki na manghatai i Ama Selpi dohot Nai Selpi, ro ma Ama Jaiang mandapothon nasida laho paboahon na sinangkap ni rohana. "Bah! Na ro do ho?
Laos so dilehon ho do apala saotik di hami tuhor ni horbo sibadar mi, nanggo apala adong laba ni na mambegei barita" ninna Nai Selpi tu Ama Jaiang huhut mengkel suping ibana mandok hatana.
"I ma dah Inanguda. Balga do nian dijalo hami tuhor ni horbo sibadar i, alai nunga adong be na laho hapeahan ni hepeng i" ninna Ama Jaiang mangalusi Inangudanana i.
"Tudia laho bahenonmu hapeahan ni hepeng na sai godang?" ninna Ama Selpi manolukhon hatana.
"I do nidok ni harorongku Amanguda. Napaboahon do ahu tu hamuna tarsingot di sangkap ni roha nami dohot parumaenmu. Disangkapi roha nami nian naeng pajongjong balebale di porlakta na didolok ni gareja an" ninna Ama Jaiang paboahon sangkap ni rohana.
"Tungkan dihana disangkapi roham laho pajongjongonmu?" ninna Ama Selpi mandapothon hata ni Ama Jaiang.
"Na adong i ma batu na bolon i Amanguda, i ma na dilambung ni hariara i" ninna Ama Jaiang mangalusi.
"Dang mabiar ho pajongjong jabu di si? Ai songe do inganan i. Mardomu muse, ingkon tabaon do hariara i molo naeng disi pajongjongonmu" ninna Ama Selpi songon na pabiar-biahon Ama Jaiang, asa haru sundat di inganan na tinodona i ibana laho pajongjong undungundungna.
"Daong Amanguda. Naung tinodo ni nipinghu do inganan i. Molo tarsingot hariara i, peak do hau na mangolu molo pajongjong hau na mate" ninna Ama Jaiang mangalusi.
"Antong ho ma. Molo disi do ditodo roham dang sipanjujui ahu jala dang sipangorai" ninna Ama Selpi. Alai anggo dibagas rohana, tung jut situtu do rohana. Ai somal hian do dibegei Ama Selpi sian Ompung ni nasida, inganan na martua do inganan na tinodo ni Ama Jaiang i. Ganda ma muse jut ni rohana, ala so pola sadia dilean Ama Jaiang tu nasida tuhor ni horbo sibadarna i.
Tung naung denggan pe mangalap hata Ama Jaiang tu Amangudana, tarsingot tu inganan na laho hajongjongan ni undungundungna, alai tong dope dilului Ama Selpi dalan laho manundati asa unang saut pajongjong undungundungna Ama Jaiang.
Tingki na manardas na laho hajongjongan ni undungundungna i Ama Jaiang, ro ma Ompu Team songon na gasagasaon.
"Boasa disi laho pajongjongonmu jabum?
Ai nunga dihatahon Damang nahinan na laho parjabuonhu do i" ninna Ompu Team songon na gasagasa on. "Boha nimmu?
Garang nai ho Ito mandok hatami. Boru ho di huta on, alai naeng jambarmu nimmu inganan na hutodoon? Dang saparhutaan ahu dohot ho bah Ito, dang saparhutaan hami hulahulam dohot ho. Di tano na pinungka marga hamulianmu ma ho mangarajai Ito.
Molo di tano nami hulahulam dang boi ho laho mangarajai. Dang tung naoto Ompung i, mangalean inganan on laho parjabuanmu" ninna Ama Jaiang, huhut mangupir simajujungna marnida garang ni Ompu Team i mandok hatana.
"Sandok dang boi dison pajongjongonmu jabum, na di ahu do on didok Damang nahinan" ninna Ompu Team.
"Begei Ito! Nunga denggan be ahu mangalap hata tu Amanguda Ama Selpi na laho dison pajongjongongku undungundunghu. Molo pola do sai oraanmu ahu laho pajongjong undungundunghu dison, hutanom do ho mangolu diinganan on. Paleleng ma disi! Saut do ho tanomonku tongkin nai" ninna Ama Jaiang huhut dipajonok ibana tu Ompu Team.
Marnida rimas ni Ama Jaiang i, marlojong ma Ompu Team huhut marsurak-surak mandok hatana "Buat hamu on huta.... Laho tanomon ni na gojong on ninna ahu mangolu di panardasanna on. Buat hamu on huta...".
Songon i ma surak-surak ni Ompu Team i hira na sisundeon, asa haru marsala didok rohana Ama Jaiang begeon ni donganhutana.
Marudut...
☆ Ulos Na Matombuk (21) ☆
Dipuhuti Ama Jaiang ma na manardas na laho parjabuanna i, dung maringkat Ompu Team manadingkon ibana. Otik pe dang tagam roha ni Ama Jaiang na laho mangalualu Ompu Team tu Ama Selpi.
Jala sian na so panagaman ni riha ni Ama Jaiang, ro ma Ama Selpi dohot Ompu Team manorui Ama Jaiang tu panardasan i.
"Ateh Ama Jaiang? Naeng tanomonmu mangolu ninna Namboru on di panardasanmon. Toho do i?" ninna Ama Selpi manungkun Ama Jaiang.
"Toho Amanguda. Toho hudok do nangkiningan songon i" ninna Ama Jaiang mangalusi sungkun-sungkun ni Ama Selpi i.
"Bah! Dirimpu ho do nang borsak hadirionmu? Naeng tanomonmu nimmu mangolu Namboru on..."
"Na didok do nunga dihatahon Ompungta nahinan na laho parjabuanna ingana na hutardas on. Dang naoto ra Ompungta lehononna parjabuan pate di bagas parik ni huta tu pamoruan" ninna Ama Jaiang paboa siala ni parhehe ni rimasna.
"Toho do i. Nunga husungkun Inonghu Ompungpudanmu. Toho do ninna na laho di Namboru on inganan on" ninna Ama Selpi tu Ama Jaiang, asa haru sundat dipajongjong Ama Jaiang undungundungna di tano naung tinardasna i.
Umbegei hata ni Ama Selpi i, lam hehe ma rimas ni Ama Jaiang. Dibuat Ama Jaiang bonggas na pinangkena mandungki batu na manardas na laho parjabuanna i, dipajonok ibana tu halak Ama Selpi.
"Tung otik dang adong diparhatutu rohanghu na adong pandohan ni Ompung na laho di boru sisingke panggalege on inganan na hutardas on. Alai ipe, saut pe na dibagas roha muna i. Borhat pe hami marsogot manadingkon huta on.
Alai ingot! Sanga ise pe na barani pajongjong undungundungna diinganan na hutardas on asing sian pinomparhu, ingkon songon parpurpur ni orbuk ni tanoon ma parpurpur ni parngoluanna" ninna Ama Jaiang huhut dipurpurhon ibana tano na ginolomna i.
"Boasa songon i hatam Ama Jaiang?" ninna Ama Selpi songon na marangkup biar mandok hatana. Ai dipartautauhon Ama Selpi do nasailaon pangontak ni hata ni Ama Jaiang, molo pola marangkup rimas ibana mandok hata bura.
"Dang sai songon i anaha..." "Paleleng ma apala satongki nai di son, laos toho do annon tanomonhu hamu nadua mangolu di inganan on" ninna Ama Jaiang huhut digolom ibana bonggasna massai gomos.
Marnida rimas ni Ama Jaiang i, ditadingkon halak Ama Selpi ma Ama Jaiang di panardasan i.
Dung lao halak Ama Selpi, diuduti Ama Jaiang ma muse manardas parjabuan i. Unang gabe hira bogas na so sidung didok rohana bogasna i, dipasidung Ama Jaiang do manardas parjabuanna i.
Ala didok rohana dang tuk gogona molo sahalakna laho pasidung bogasna i, dihara Ama Jaiang ma angka dongan huta ni nasida laho mangurupi ibana pasidung bogasna i.
Tung so adong do na manjua sian saluhut na hinara ni Ama Jaiang i. Ai dang hinata, Ama Jaiang pe tutu na ura sareaon ni angka dongan hutana do saleleng on.
Tingki na manardas i nasida dohot angka dongan na hinara ni Ama Jaiang, adong ma sahalak sian nasida na manungkun Ama Jaiang.
"Nunga mandok sidung hona tardas parjabuonmon Lae, ise do na laho pandena?" ninna sisahalak i manungkun Ama Jaiang. Ama Sotar panggoaran ni na manungkun i, jala tong do pande ruma Ama Sotar i.
"Eh... Molo saut hian pajongjongon nami undungundung di inganan on, Lae hian do ditodo rohanghu na laho pandena. Alai marsogot borhat nama hami manadingkon huta on, asa haru sombu rohani Amanguda Ama Selpi dohot halak Ompu Team.
Jei bodari, di jabu nami ma jolo hita manggadong, songon dalan nami mandok mauliate tu hamu saluhutna. Saleleng on, burju be do hamuna tu hami saleleng di huta on hami" ninna Ama Jaiang mangalusi.
Hohom nasida sude na umbegei alus ni Ama Jaiang i, hohom siboan pingkiranna be. "Antong molo na ingkon borhat do hamu marsogot, tahudushon ma na manardas on" ninna salak sian nasida.
Dihudus nasida ma tutu na pasidung bogas i, jala sude ma hira na lam marsitutu hira na so diboto loja na manardas i. Dung sidung ditardas nasida inganan i, mulak be ma nasida tu jabuna be.
Saut ma tutu di jabu ni halak Ama Jaiang nasida manggadong borngin i. Hata do manggadong. Dupatupa Ama Jaiang do sada lomoklomok dohot manuk laho allangon ni nasida.
Gariada tahe, dohot do tuak tangkasan nang dohot samsu diparade Ama Jaiang inumon ni nasida dung sidung mangan. Maerendei nasida saborngin i, songon na pasombu roha parhaseang tingki na so sadia leleleng nai be naeng marsirang.
Marudut....
☆ Ulos Na Matombuk (22) ☆
Dung hira laho mandapothon buhabuha ijuk, patu mulak be ma saluhut angka dongan sahuta ni Ama Jaiang na piniona manggadong dibjabuna borngin i.
"Nunga mulak be sude angka tondongta, tongkin nai mandok tiur nama ari. Holan bissar annon mataniari, borhat do hita manadingkon huta on. Jei, mangalap gogo ma jolo ho satongkin! Molo ahu, laho tu panardasan an dope ahu satongkin paima bissar mataniari" ninna Ama Jaiang tu Tungganiboruna Nai Jaiang.
"Tutu situtu do hita borhat annon diparbissar ni mataniari laho manadingkon huta on?" ninna Nai Jaiang manungkun Ama Jaiang. Hira nipi dope didok rohana pandohan ni Ama Jaiang na mandok laho tadingkonon ni nasida huta bona pasogitna i.
"Tutu. Ia surat na husuru paulionmu nantoari sada, surat hatorangan pinda hurianta do i dohot surat hatorangan parpindaanta sian huta on. Nunga hibul be rohangku laho manadingkon huta on, asa haru sombu rohani halak Amanguda si Selpi dohot Ito Ompu Team na mangapas hadirionku di huta on" ninna Ama Jaiang mangalusi.
Tong dope hira na so porsea Nai Jaiang di hata ni Ama Jaiang i. Dibuat ibana ma surat na nidok ni Ama Jaiang i jala dipareso ibana. Toho ma tutu, surat hatorangan parpindaan ni nasida do surat na sinuru ni Ama Jaiang i paulion ni Nai Jaiang.
"Mangalap gogo ma jolo ho! Asa tu panardasan an jolo ahu satongkin" ninna Ama Jaiang huhut dibuat ibana sulim na sangkot di dorpi ni jabu i.
Dang dialusi Nai Jaiang be hata ni Ama Jaiang i ala tong dope songon na marnipi nang so modom pangholalaanna, di na mamingkiri parborhat ni nasida na laho manadingkon huta i songon na nidok ni Ama Jaiang i.
Borhat ma Ama Jaiang marsulu telong tu panardasan na sundat pinajongjongna undungundungna di si.
Hundul ma ibana di panardasan i, jala dipantingkon Ama Jaiang ma sulu telong i di jolona.
Ditatap Ama Jaiang pangeoleol ni dila ni api ni sulu telong i, na mangeoleol ala ni pangullus ni alogo na angon-angon.
"Haru bosi boi malala dibahen ho, alai boi do saguru di pangullus ni alogo pangeoleolmu. Sabalga-balga ni hau na bolon pe tahe boi do bahenonmu gabe orbuk, alai mintop do ho dibahen tiris-tiris ni langit.
Huulushon ma nuaeng alogo marhite sulimhon mardongan ilunghu na maraburan, lambohi ma rimas na songon api na marnala-nala di ateatenghon!" ninna Ama Jaiang manghatai sasadasa marsoara nenget, tingki na manatap pangeoleol ni api ni sulu telong i na dijolona i
Diporo Ama Jaiang iluna na maraburan sian simalolongna laos diapushon ibana ma i tu sulimna. Dipapimpit ibana simalolongna, jala diullus ibana ma sulimna i.
Marsaringar soara ni sulim ni Ama Jaiang i, mambahen tarsunggul angka dongan hutana na umbegasa. Gariada tahe, sampe adong do dua tolu halak na mandapothon Ama Jaiang ala mambegei soara ni sulimna i.
Topet naeng jonok nama na mandapothon Ama Jaiang i, mintop ma sulu telong na di jolo ni Ama Jaiang i, mambahen gabe dang diboto nasida ise do na marsulim i.
"Santabi! Ise do hamu na marsulim i?" ninna sahalak na ro mandapothon Ama Jaiang i. "Ahu do i Lae, Ama Jaiang" ninna Ama Jaiang mangalusi. Tangkas do ditanda Ama Jaiang soara ni na manise ibana. Donganna saparsiadaparian do na manise ibana.
"Bah! Lungun ma soara ni sulimmi Lae, pola do sampe tarhinjat ahu sian podoman umbegei soara ni sulimmi. Sanga do nangkiningan dao sura-sura ni rohangku tingki umbegei soara ni sulimmi.
Diporo Ama Jaiang saulak nai ilu na maraburan sian simalolongna, dung i diapushon ibana tu sisik ni tano panardasan i, huhut marsoara nenget ibana manghusipho "Diorong panangga do na do ompuna". Dung didok ibana songon i, dipagalap ibana ma muse sulu telong naung mintop i.
Dipajonok angka na ro mamereng Ama Jaiang i ma tu Lambung ni Ama Jaiang dung galap muse sulu telong i. "Bah! Dung pe tangkas huida bohimi Lae, ipe asa tung pos rohanghu na ho do na mamalu sulim i" ninna donganna ni Ama Jaiang donganna saparsiadaparian i.
"Nidokmu, ise ma pola na marsulim di inganan on ia so ahu Lae?" ninna Ama Jaiang huhut songon na dipatanggir ibana salibonna. "Eh... Dang diboto Lae huroha?
Dison hian do najolo langgatan parulubalangan ni huta on" ninna donganna i. "Ah... Holan na pabiar-biarhon do ho Torhis" ninna Ama Jaiang huhut mengkel suping ibana mandok hatana i.
"Ido Lae... Hurimpu do nangkiningan na hehe parlanggatan na diinganan on hian. Alai tahe. Sombu hian do rohanghu Lae, nunga leleng dang digoari ho ahu. Dung marhasohotan ma ho tahe" ninna donganna i.
"Daong Lae. Na apala songon na lungun do rohanghu di na laho manadingkon huta on Lae" ninna Ama Jaiang huhut manetek ilu sian simalolongna.
"Boha nimmu Lae? Tadingkononmu nimmu hutanta on?" ninna si Torhis songon na songgot rohana rohana umbegei hata ni Ama Jaiang i.
Dibereng Ama Jaiang nunga songon na naeng bissar mataniari sian habissaran. Nunga songon na tarida naeng maningkir-ningkir mataniari sian bungkulan ni dolok ni huta ni nasida.
"Santabi ma jo di hamuna na ro mandapothon ahu tu inganan on, naeng borhat nama hami manadingkon huta on holan bissar mataniari. Jei, mulak ma jolo ahu ateh?
Asa sanga jolo martapian ahu tu passur paridiantaan parpudi sahali, paiama borhat hami manadingkon huta on" ninna Ama Jaiang huhut hehe ibana sian hundulanna.
"Antong, rap ma hita tu jabu muna Lae. Ingkon dohot do ahu paborhathon ho molo na tutu do naeng tadingkononmu hutanta on" ninna donganna si Torhis i.
"Lae ma. Molo i do pangidoan ni roha ni Lae. Nah Lae! Sulimhon ma partading ni parningotan dibparalealeanta sian ahu. Pangke ma on molo tarsunggul ho tu paralealeanta i" ninna Ama Jaiang huhut dilehon ibana sulimna i tu si Torhis.
Dung dijalo si Torhis sulim i, borhat ma nasida manadingkon panardasan i. Alai holan si Torhis do na rap dohot Ama Jaiang mandongani Ama Jaiang tu Jabuna. Molo na dua tolu halak nai na ro mandapothon Ama Jaiang i, mulak be do nasida tu jabuna be.
Marudut...(***)
0 Komentar