Home » , , , , , » Pesta Parolop-Olopon, 50 Tahun Hasadaon Ni Pomparan Toga Sinaga

Pesta Parolop-Olopon, 50 Tahun Hasadaon Ni Pomparan Toga Sinaga

Written By PPTSB JAMBI on Senin, 15 Oktober 2018 | 15.08

ILUSTRASI-COVER BUKU ACARA MUBES PPTSB OKTOBER 2018. FOTO GWA PPTSB SE INDONESIA.
*50 TAON HASADAON NI POMPARAN TOGA SINAGA*
*DISADA PANDOHAN “SI SADA LULU ANAK, SI SADA LULU BORU”*
*DOHOT DISADA PANJOUON “SINAGA”*
 
*Dohot Tanda Hasadaon ima: Monumen Tugu Toga Sinaga*

*Patujolo*

Arkian, sian hasosorang ni Ompungta Toga Sinaga dohot angka tinodohonna sian Daompung Siraja Lontung dohot Siboru Pareme, dang adong torsa na dapot hita, ia angka pomparan ni Siraja Lotung i, na so jadi marsiolian.

Laos ido dihita Pomparan ni Ompungta Toga Sinaga, dang adong torsa na sahat tu hita na mandok ia pomparan ni Toga Sinaga na so jadi marsiolian. 

Boi do i berengonta di bonapasogit ta di Samosir, ima sian pomparan ni Ompungta si Sia Ama i, bahat do na marhula-marboru ala ni angka pangolian sian anak manang hamulian ni boru. Gabe jala marpinompar do angka pomparan ni Ompungta i naung marsigabean i.

*Soso-soso Hasadaon*

Marmula ma di taon 1938 di Medan, marpungu ma Pomparan ni Ompungta Si Raja Lontung mambahen sada “Punguan” songon dalan laho pasadahon pomparan i di luat pangarantoan asa boi marsitogu-toguan diangka ulaon las ni roha, suang songon i nang di ulaon dok ni roha.

Alai mamungka sian taon 1940, sorang ma pamingkirion di pomparan ni Ompungta Toga Sinaga na adong di Kota Medan laho papunguhon pomparan ni Toga Sinaga dohot sihol ni roha asa boi marsada diangka ulaon paradaton suang songon i laho mambahen pamingkirion diangka panungkolion diparngoluon siadapari marhite na pajongjongkon usaha na digoaranna“Kongsi”, manang nuaeng on di dok ma i “Koperasi”. 

ILUSTRASI: Pelantikan Pengurus PPTSB Cabang Toba Samosir Periode 2018-2022. Foto GWA PPTSB Jambi
Dung singkop angka pamingkirion dohot pangaradeon, dipaojak ma Punguan i di tanggal 15 Desember 1940 dohot goar PARSADAAN POMPARAN TOGA SINAGA (PPTS).

Dipardalanan ni Punguan i, mansai godang do angka hangaluton marhite haroro ni Panjaja Jepang di taon 1942 dohot hame-merdeka ni bangsonta Indonesia taon 1945 dohot angka pergolakan-pergolakan (hagunturon) ni politik proses hamerdekaon, jala sipata martabuni do angka pengurus ni PPTS laho mangulahon angka ulaon nasida, ala sampe do adong abat-abat dibaen panjaja ima manutup punguan PPTS.


*Haojahan ni Hasadaon*

Mardalan do kegiatan ni PPTS sian hao-ojakna sahat tu taon 1964 dohot 4 (opat) hali pargantian ni hapanguruson, jala nungnga rarat barita ni PPTS on sahat tu huta-huta na adong humaliang Kota Medan.

Di bona ni taon 1964, sahat ma Amanta Letkol Pol Drs. Mula Horas Sinaga di Medan, pinda sian Surabaya jala mangula ma nasida di Polda Sumut. 


Pajumpang ma angka pomparan ni ompungta Toga Sinaga na adong di Kota Medan, isara na Letkol TNI TPR Sinaga, Mayor TNI Mardame Sinaga dohot angka na asing, jala disangkapi nasida ma Punguan PPTS asa lam marbungaran marhite na mangalehon roha dohot pingkiran na be.

Dipatupa ma pasingkophon Hapangurusan peralihan na baru di periode 1964 sahat 1966 dohot Ketua Umum amanta Letkol Pol Drs. Mulahoras Sinaga. Disangkapi ma laho patupahon Mubes I PPTS di taon 1966 dohot sangkap ima:

*1.    Mambahen goar ni Punguan i gabe Parsadaan Pomparan Toga Sinaga dohot Boru (PPTSB)*
*2.    Mansangkapi hajongjongan ni Tugu Parsadaan di pomparan ni Toga Sinaga dohot goar Tugu Toga Sinaga*
*3.    Pahembangkon PPTSB asa marluat-luat sahat tu desa na 8 (ualu)*
*4.    Patotahon angka tarombo di sude pinompar ni Toga Sinaga.*

Di na mansangkapi haojahan ni Tugu Parsadaan i, dipaojak ma angka Parhobas marhite Panitia na mangula rap dohot pangurus pusat. Dibahen do padalanhon “Kupon” tu sude pomparan ni Toga Sinaga na adong disude luat di Sumatera Utara asa adong laho mambiayai hajongjongan ni Tugu i, jala laos marhite na padalanhon “kupon” ima songon hasahatan ni barita tu sude pomparan ni Toga Sinaga na laho pajongjongkon Tugu Parsadaan Toga Sinaga.

Sahat ma ari na uli ari na denggan, marroan ma angka pomparan ni Toga Sinaga sian desa na 8 (ualu) tu huta Urat, Samosir laho pasadahon tahi dohot sangkap marhite-hite “Pesta Olop-olop Pomparan ni Toga Sinaga” ima mangaresmihon Tugu Parsadaan “TUGU TOGA SINAGA” di ari Minggu tanggal 7 Juni sahat ari Minggu tanggal 14 Juni 1970. Dibungka do Ulaon i marhite Parmingguon jala diujungi ma ulaon i tong marhite Parmingguon.

Di pesta ni Pomparan ni Ompungta Toga Sinaga na saminggu i, mardosniroha huhut mardosnitahi ma sude pomparan ni Toga Sinaga ima:

*1.    Marsada ma dipanjouon ima Marga Sinaga, jala diojakhon ma ia sude pomparan ni Toga Sinaga “Sisada Lulu Anak, sisada lulu boru”. Asa unang adong panjouon dimarga sian Si-Tolu Ompu manang Si-Sia Amai songon naung adong dipiga-piga huta di Samosir.*
*2.    Ala nungnga sude Pomparan i “Sisada Lulu Anak, Sisada Lulu Boru” asa unang be masiolian jala marsigabean sian Pomparan ni Toga Sinaga.*
*3.    Dipanjouon paradaton asa dijouhon ma Pomparan ni Toga Sinaga ima Si-Tolu Ompu, Si-Sia Ama.*
*4.    Punguan ni sude Pomparan ni Toga Sinaga ima Parsadaan Pomparan Toga Sinaga dohot Boru, dang adong na asing sian i.*

Mamungka sian na marsada sude Pomparan ni Toga Sinaga di hao-ojak ni Tugu Parsadaan i, laos mamungka sian ima sude pomparan ni Toga Sinaga di sude luat manghangoluhon na sisada lulu anak sisada lulu boru, jala sada di panjouon.

*50 Taon Hasadaon ni Pomparan Toga Sinaga*

Taon 2020 nanaeng ro, gok ma 50 taon pomparan ni Toga Sinaga paojakhon *“hasadaon”* dinamarhaha-maranggi dohot marboru di huta Urat, Samosir.

Beha do hasadaon di Pomparan ni daompung Toga Sinaga sahat tu hatiha taon milenium on?

Astuanna, uli jala denggan do pardalanan ni pomparan ni Toga Sinaga ima napinadimun-dimun marhite punguan PPTSB, mulai sian Pusat sahat tu sektor-sektor di luat Indonesia on.

Tontu mandok mauliate ma hita tu TUHANTA DEBATA ala dilehon habisuhon dohot pamikkirion namansai uli tu angka natua-tuanta NAUNG PASADAHON hita sude Pomparan ni Ompungta Toga Sinaga dohot Boru marhite-hite Pesta Olop-olop laos paojak Tugu Parsadaan na di taon 1970 na salpu. 

Ala ni i, mansai porlu di hita sude Pomparan ni ompungta Toga Sinaga dohot Boru na di partingkian nuaeng on asa tongtong ma tarahut hasadaonta i diangka panghobasiaon ditonga-tonga ni Pomparan ni Ompungta na gabe i Toga Sinaga.

*Pesta Olop-olop 50 Taon Hasadaon Pomparan Toga Sinaga taon 2020*

Asa boi lam tang jala lohot padan “Hasadaon” naung dipukka angka natua-tuanta di taon 1970-an, taparade ma rohanta laho marsada jala marpungu rap hita Patupahon *“Pesta Olop-olop diparningotan 50 Taon Haojahan Hasadaon ni Pomparan Toga Sinaga di Tugu Parsadaan Toga Sinaga di Urat, Samosir”* bulan Juni taon 2020 nanaeng ro.

Molo hinsa do rohanta, asa ta pa andar ma sinta-sintan-ta on di Mubes nanaeng ro, asa boi gabe sada Program na bersifat Ad-hock di periode 2018 s/d 2022. Beha pandapotta angka dongan!!! Di acara Mubes ta i ma tabahen alusna ganupan. Horas ma di hita angka Pomparan ni Daompung Toga Sinaga. (Bekasi, 5 Juli 2018-Oleh-*Pnt. Yas L. Sinaga, MBA-Ketua Departemen Organisasi dan SDM PPTSB)
Share this article :

Posting Komentar

 
Support : PPTSB JAMBI | | Copyright © 2012. PPTSB JAMBI -Komunitas PPTSB WILAYAH JAMBI